Breaking Bads kyniske sjefsadvokat, Saul Goodman, får sin eigen spin-off-serie. Det har lenge vore rykta om at Bob Odenkirks figur i serien skulle ta opp stafettpinnen etter at historia om Walter og Jesse var over, men først i natt vart det endeleg avtalt, ifølgje blant anna Deadline.
Saul Goodman vart opphavleg laga for éin episode i andre sesong av serien, men vart såpass populær at han dukka opp fleire gongar i løpet av seriens levetid. Allereie i fjor tok serieskapar Vince Gilligan for første gong opp ideen om Saul i ein eigen serie:
– Eg elskar tanken på eit advokatshow der advokaten vil gjere alt som står i hans makt for å halde seg utanfor domstolen. Han gjer forlik på trappa utanfor, kva som helst så lenge slepp unna rettssalen. Det hadde vore moro, eg hadde likt det, sa han då til Indiewire.
Intervju med «Breaking Bads» Hank: 2 Den eneste med moralen i behold!
Netflix var òg interessert
AMC har visstnok dratt ut forhandlingane litt, men fekk fart på sakene då produsentane i Sony byrja å snakke med andre kanalar (visstnok, blant anna Netflix) om å plukke opp ideen.
Avtalen er ikkje heilt landa enno, men AMC, Sony og Odenkirk har ein lisensavtale i hamn som er eit godt utgangspunkt for å starte på ein pilotepisode. Better Call Saul skal undersøke kva som gjorde Saul til Saul før han møtte Walt og Jesse.
Serien skal, trass hovudpersonen, ikkje bli ein komiserie – men likevel vere tematisk lettare enn dramatiske Breaking Bad. Om du vil ha ein forsmak kan du sjekke advokatens nettside, BetterCallSaul.com.
Denne veka kjem fjortande episode av femte og siste sesong av Breaking Bad, sesongen har 16 episodar og den aller siste vil gå 29. september. I Noreg går serien på TVNorge MAX, sundagar klokka 23.00.
Spinoffseriar har ikkje alltid det beste ryktet, men det finst unntak. Vert dette ein Joey eller ein Frasier?