Leonardo DiCaprio skal spele ei aldrande filmstjerne som hjelper ei ung skodespelarinne, spelt av Beyonce, på vegen mot suksess.
Foto: JOHN MACDOUGALL / AFPRegissør Clint Eastwood skal lage ei nyinnspeling av klassikaren «A star is born» og gir songarinna Beyoncé Knowles ei av hovudrollene. Frå før av er det kjent at Leonardo DiCaprio skal spele den mannlege hovudrolla.
Beyoncé avslørte nyheita i eit intervju på frukostshowet «Good Morning America» nyleg. Ho uttalte at det var ei ære å få rolla.
– Clint Eastwood? Kan du tru det? Eg kan framleis ikkje det. Då eg møtte han var eg berre overvelda. Det er ei ære at han har tru på meg. Eg kan ikkje vente med å byrje å jobbe med denne filmen, sa ho.
Les også:
DiCaprio som aldrande filmstjerne
«A star is born» er blitt spelt inn tre gongar tidlegare, i 1937, 1954 og 1976. Beyoncé skal følgje i fotspora til Janet Gaynor, Judy Garland og Barbra Streisand, som har hatt hovudrolla før henne.
Skodespelarane i dei ulike filmversjonane har vunne fleire Oscar-prisar og -nominasjonar, så Beyoncé har mykje å leve opp til.
Leonardo DiCaprio (37) spelar ei aldrande filmstjerne, som slit med alkoholmisbruk. Han hjelper ei ung skodespelarinne, spelt av Beyoncé (30), på vegen til suksess. Karriera hans går nedover, medan hennar går oppover. Likevel forelskar dei seg i kvarandre.
Eastwood og DiCaprio har forøvrig nettopp spelt inn ein film saman, «J.Edgar», som etter planen får premiere mot slutten av året.
Suksess på hitlistene
Judy Garland spelte i 1954-versjonen av 'A star is born'. No skal Beyoncé fylle hennar rolle.
Foto: WikipediaDet er ikkje første gong popstjerna prøvar seg på film. Ho har tidlegare spelt i filmane «Austin Powers in goldmember», «The fighting temptations», «Dreamgirls» og «The pink panther». Sistnemnde vart slakta, men Filmpolitiet meinte at det ikkje var Beyoncé sin feil at filmen var så dårleg.
Popstjerna opplever stor suksess om dagen, og er nummer éin på den britiske albumlista etter at ho spelte på festivalen Glastonbury sist veke. Ho er aktuell med albumet «4», som passande nok er hennar fjerde soloalbum.
Les: Lydverkets vurdering av «4»
Albumet vart lansert på verdsbasis 28. juni og det er venta at det også vil ta førsteplassen i mange andre land, ikkje minst på Billboard-lista i USA.
Beyoncé vart kjent gjennom vokalgruppa Destiny's Child og har som soloartist samarbeida mykje med den norske produsentduoen Stargate. Ho er gift med rapparen Jay-Z, som ho også har samarbeida med musikalsk.
Les:
Sjå: Musikkvideoen «Let's Run The World (Girls)»:
