Tidlaust speleventyr, var spelanmeldar Rune Håkonsen si omtale av Shadow of the Colossus då det kom ut i nyoppussa utgåve i fjor. Spelforteljinga, som i seg sjølv er sterkt filmatisk, kryp no nærare og nærare å bli spelefilm.
Frå før av visste ein at Josh Trank, regissør og manusforfattar bak den engasjerande «superhelt»-filmen Chronicle skulle regissere, no er òg manusforfattar på plass. Seth Lochhead, mannen bak eventyrthrilleren Hanna er no tilsett på prosjektet, melder THR.
Manusforfattar som kan det meditative
Shadow of the Colossus tek stad i ei forlaten, forboden verd. Hovudpersonen Wander må ta livet av 16 kjemper, kalla kolossar, med mål om å gjenopplive sin kjære Mono.
Resultatet vart ei tidvis heseblesande, men overraskande meditativ oppleving (ikkje heilt ulikt det eg synest om Hanna, når eg tenkjer meg om).
Anmelding: Hanna: – Ei jente trenes opp til å bli et drapsinstrument
Så gjenstår det å sjå om me klarar å få den same tilknytinga til hovudpersonen i filmen, når me ikkje personleg får styrt han gjennom oppgåva med å kjempe mot kolossane.
(Om du ikkje har spelt det, sjå introduksjonsvideoen til spelet her for å få eit inntrykk.)
Første versjon av filmmanuset var skrive av Justin Marks, mannen bak spelfilmkalkunen Street Fighter: The Legend of Chun-Li frå 2009. Forhåpentlegvis er valet om ein ny forfattar eit ledd i rett retning.
Men slapp av, spelskapar Fumito Ueda let uansett ikkje Sony Pictures stikke heilt av med historia hans. Spillauteuren har ikkje sagt korleis han er involvert i filmen, men at han «absolutt ikkje ikkje har noko med filmen å gjere». Eller «creative consultant» som det gjerne heiter i Hollywood.
Anmelding: Shadow of the Colossus: – Skaper en dynamikk som setter spor i spilleren
Lite detaljar enno
Ein av Josh Trank sine tidlege kortfilmar.
Regissør Josh Trank er ein mann som likar å leike med store krefter, og gjere dei litt meir tilgjengelege, noko ein har sett i fleire av prosjekta hans (til dømes den tullete kortfilmen Stabbing at Leias 22nd).
Om filmatiseringa av Shadow of the Colossus påverkar dei annonserte Marvel-filmane han visstnok er knytt opp til (Venom og Fantastic Four), seiest ikkje.
Produsent Kevin Misher har stått bak alt frå ambisiøse Public Enemies til labre The Scorpion King 3: Battle for Redemption. Skodespelarar, premieredato og andre viktige ting er ikkje kjend enno – for så vidt ikkje heilt ulikt Michael Fassbenders Assassins Creed-prosjekt.
Les også: Michael Fassbender speler i Assassins Creed-film
Kva trur du om å lage ein film av eit spelverk som Shadow of the Colossus?