For ti år sidan eksisterte det rundt 300.000 bloggar i Noreg, og dei mest populære hadde fleire hundre tusen lesarar i veka.
Etter kvart gjekk bloggarane over på andre hotte plattformer, som Instagram, og dei aller første influensarane, slik me kjenner dei i dag, vart fødde.
I bloggens gullalder var det stadig kriging om å vera på toppen, men i denne kåringa har ting gått litt meir diplomatisk for seg. I samband med TV-serien «Rekviem for Selina» valde me ut 50 nominerte som de lesarar kunne stemma på.
No er resultatet klart – desse ti influensarane er stemte fram som tidenes mest ikoniske:
10. plass: TCMN
Bio: Therese Charlotte Margrethe Nielsen, derav bloggnamnet TCMN, begynte å blogge i 2008 som 14-åring. Tromsøværingen skreiv om klassiske ting som mote, sminke og kvardag, men også etterkvart om plastiske operasjonar.
TCMN nådde sitt høgdepunkt i 2013 då ho konkurrerte mot Sophie Elise om førsteplassen på blogglistene og var med i «Charterfeber». Men etter kvart vart ho vart lei av å legge ut om livet sitt på nett, og i 2018 skreiv ho sitt siste innlegg.
Minneverdige augeblikk: TCMN var ein fast bloggstopp for mange unge på 2010-talet, men det dei aller fleste hugsar, er «krangelen» ho hadde med Sophie Elise i 2011. Dei to stod fram som erkefiendar og dissa kvarandre, men det lesarane ikkje visste, var at det heile var avtalt spel mellom nordlendingane for å få fleire klikk inn på bloggane.
Sophie Elise klatra seg opp på ein stabil tredjeplass etter at krangelen blei lansert, og influensaren har i etterkant sagt at ho kan blant anna takka TCMN for at ho fekk ein karriere som bloggar.
Kvar er ho no: TCMN har trekt seg tilbake frå rampelyset, men har likevel det blå offentleg-ikonet på Instagram der ho har nesten 180.000 følgarar. På plattforma deler ho ærleg om utfordringane som følger med å bli mor for første gong. Etter å ha jobba ein periode som frisør, har ho dei siste åra gått over til å jobbe i bank.
9. plass: Jenny Skavlan
Bio: Spelte i filmen «Jakta på Nyresteinen» i 1996, men slo for alvor gjennom i Grandiosa-reklamen «Full Pakke» i 2007. Har sidan spelt i fleire filmar, vore med i realityserier og er medeigar i gjenbruksappen Tise og ein av grunnleggjarane av selskapet Fæbrik.
Minneverdig augeblink: I 2012 var ho programleiar på NRKs nye humorsatsing «Tweet4Tweet», som skulle bli eit «Nytt på nytt for sosiale medium». Programmet vart omtalt som flaut, krampaktig og sjølvoppteke, og Dagbladet trilla ein einar på terningen.
Her kan du sjå eit klipp frå ein konkurranse på «Tweet4Tweet» der vinnaren blei retweeta av panelet <3
Det vart med åtte episodar før NRK tok programmet av lufta.
Kvar er ho no: Stadig aktuell med «Fæbrik» og var nyleg med på NRK-serien «Brekket». I 2023 tok Skavlan ein pause frå sosiale medium, då ho var nær med å bli utbrent.
8. plass: Vegard Harm
Bio: Den einaste guten på lista! Var Noregs mest følgde brukar på det sosiale mediumet Vine. Suksessen der førte i 2015 til NRK-programmet «Tara og Vegard» saman med Tara Lina Shahin kjent frå «Desken brenner» og «Med all respekt».
Sidan har han hatt fleire ulike TV- og podkastkonsept. Den snart 29 år gamle fyren frå Stokke vann Gullrutens publikumspris saman med Morten Hegseth i 2019.
Sjå 18 år gamle Vegard Harm i «Dagsrevyen» her:
Minneverdig augeblink: I 2021 deltok han i «Kompani Lauritzen». Det tok to timar frå han kom til leiren til han fekk eit samanbrot og ville heim.
– Eg tenkte «få meg heim, eg vil ikkje dette»! Det var ikkje sånn eg trudde det skulle vera, og eg såg ikkje for meg eitt minutt til der inne, sa han til Dagbladet.
Men Harm reiste seg frå samanbrotet og var med i fleire veker før han måtte forlata programmet.
I fjor gjekk det rykte om at han og Ida Fladen venta barn saman, etter eit kryptisk innlegg på Instagram, men det viste seg å berre vera promo på eit nytt program på VGTV. Apropos VGTV, i fjor fullførte han også Norseman med Jørgine Vasstrand i programma deira «Vegard X Funkygine».
Kvar er han no: Har stadig podkasten «Harm og Hegseth» og hadde nyleg premiere på ny sesong av «Vegard X Funkygine».
7. plass: Isabel Raad
Bio: Frå Stavanger. Fødd i 1994 og byrja å blogga i 2012. Deltok i «Paradise Hotel» i 2015 og 2018, og var med i «Girls Of Oslo» i 2023 og 2024.
Minneverdig augeblink: Var den første influensaren som hamna i ein skikkeleg some-krig med Mads Hansen (som me kan røpa at kom på 11. plass i denne kåringa). Han kritiserte ho for å fremja kosmetiske inngrep, medan ho omtalte han som «Noregs største mobbar».
Krangelen gjekk føre seg frå 2016 til 2018, før dei inngjekk ei våpenkvile. I 2020 angra Isabel på delinga av før- og etterbilde av ulike kosmetiske inngrep og omtalte seg sjølv som «eit av dei verste førebileta i Noreg». Dette førte også til at Mads Hansen sa at ho no var eit «godt førebilete».
I 2021 fekk nettbutikken hennar «Trendy Things» kritikk frå Miljødirektoratet for manglande openheit om innhaldet i varene dei selde. Det viste seg også at tinga dei selde, kunne ein få tak i på andre nettstader til ein billigare pris.
Kvar er ho no: I dag er ho ein av dei mest populære influensarane på Snapchat, der ho deler flittig frå luksuslivet sitt i Dubai.
6. plass: Caroline «Fotballfrue» Berg Eriksen
Bio: Starta bloggkarrieren i 2009 under namnet «Fotballfrue» på grunn av sitt forhold til fotballspelar Lars-Kristian Eriksen. Etter at Voe slutta å blogge i 2011, var det Eriksen som hadde den mest lesne bloggen i Noreg. Var med i fire sesongar av «Bloggerne».
Lars-Kristian, som innrømte å ha skrive falske kommentarar som lege og fysioterapeut på konas blogg, la opp fotballkarrieren i 2017 for å jobbe som fotograf for kona.
Minneverdige augeblikk: Det er få som ikkje fekk med seg kontroversen som følgde dagar etter at Caroline hadde født sitt første barn i 2013. Den då 26 år gamle fotballfrua la ut bilde av seg sjølv på Instagram i undertøy.
Kritikken hagla, og bildet vart omtalt verda rundt. Her til lands gjekk kritikken på «eit utsjånadfokus som er heilt borti natta», og at bildet fekk andre mødrer til å føle seg feite – mens andre forsvarte den nybakte mora og meinte at kritikken var ufortent.
I eit intervju med «Good Morning America» fortalde Eriksen at ho la ut bildet for å motbevise det ho hadde blitt fortalt om at kroppen hennar ikkje kom til å bli den same igjen etter graviditet.
Sjølv om Caroline skreiv i etterkant at ho nok ikkje hadde lagt ut bildet om igjen, gjorde ho akkurat det same tre år seinare etter å ha født sitt andre barn.
Kvar er ho no: Eriksen har over 290.000 følgarar på Instagram, og ifølge bioen er ho personleg trenar og yogalærar. Influensaren har også ein podkast saman med legenden Guri Schanke, etter at dei to var romkameratar under «Camp Culinaris». Ho er for tida å sjå i «Kompani Lauritzen», der ho måtte ofra skoa sine i den gjørmete hinderløypa.
5. plass: Anna Rasmussen aka «Mamma til Michelle»
Bio: Anna Rasmussen begynte å blogga etter å ha fått sitt første barn som 15-åring for å få slutt på rykta om at ho ikkje var ei god mor. «Mamma til Michelle» klatra raskt opp på blogg-topplistene, og både mor og dotter var å sjå i Fem-serien «Unge mødrer».
Som 18-åring var siddisen tobarnsmor og profil i sesong 4 av «Bloggerne». 22 år gammal vart Anna gift med Jan Lossius, og dei fekk sitt første barn saman. I 2020 la Anna ned bloggen (som då hadde bytt namn til Anna Rasmussen) for godt, og året etter vart 24-åringen firebarnsmor.
Minneverdige augeblikk: Når ein mimrar tilbake til «Mamma til Michelle» si stordomstid, så er nok «dramatisk» eit ord som dukkar opp i hjerneborken hjå mange – eventuelt «clickbait». For det var overskrifter som «Vi trenger en pause!!» (frå sola), «Jeg har kjøpt stoff for første gang» (oppussing) og «I går kveld ble det mus på Jan!» (dyret, trur me).
– I starten følte eg ikkje at eg lurte nokon. Men så blei det berre verre og verre og verre, sa Anna om clickbait-overskriftene då ho var med på VGTV-serien «Da vi styrte Internett» i 2021.
Året 2017 var mamma-bloggaren stadig å sjå i media. Den sommaren delte ho sine eigne sladda nakenbilde på bloggen, for «å komma hackarane i forkjøpet». Anna trekte seg frå «Skal vi danse» før programmet i det heile rakk å starta, og bryllaupet til Jan vart avlyst/utsett.
Året vart bryllaupet avlyst for andre gong, og influensaren fekk ei saftig bot på 100.000 kroner for å ha latt vera å kåra vinnarar i fleire konkurransar ho arrangerte på Facebook.
Kvar er ho no: Det kan sjå ut som om Anna har trekt seg litt tilbake frå rampelyset dei siste åra, men ho lever framleis av å vera livsstilsinfluensar med over 126.000 følgarar på Snapchat. I fjor fortalde Anna på Snapchat at det var slutt mellom ho og ektemannen.
4. plass: Jørgine aka «Funkygine»
Bio: Jørgine Massa Vasstrand frå Ålesund begynte å blogga under namnet «Funkygine» i 2014. Ho slo igjennom med treningsvideoar saman med barna og ved hjelp av eit rumpebilde.
Sidan 2019 har TV 2 laga dokuserien «Funkyfam», og sidan 2020 har ho vore programleiar for «Norges tøffeste» på NRK. Ho deltok sjølv i programmet i 2017, og då ho rauk ut, skreiv ho eit blogginnlegg med tittelen «For et jævla nederlag!!».
I likheit med sjetteplassen i denne kåringa er også Funkygine gift med ein eksfotballspelar som la opp i 2021 og no jobbar for kona, slik at Jørgine har fridom til å gjera det ho vil.
Minneverdige augeblikk: Kom på andreplass i «Skal vi danse» både i 2019 og 2022, noko ein vinnarskalle som henne sjølvsagt ikkje syntest noko om:
– Eg hatar «Skal vi danse», ferdig snakka. Satans dritprogram, sa ho. Ho gav også «ein bitte liten fuck you til Trine» på Instagram etter exiten, til blanda respons i kommentarfeltet.
I 2019 gjekk ho og ektemannen til søksmål etter å ha funne skjeggkre i den nye leilegheita si på Torshov i Oslo. Dei tapte først i tingretten, men bestemde seg for å anka til lagmannsretten. Men også her vart det tap, og dei enda opp med å betala 223.188 kroner til motparten.
I fjor fekk NRK også fleire klagar på at ho som programleiar i «Noregs tøffeste» banna mykje, som førte til at NRK tok sjølvkritikk.
Kvar er ho no: Vann nyleg heidersprisen på Vixen Awards og er programleiar i endå ein sesong av «Norges tøffeste», sjølv om ho eigentleg annonserte at ho ikkje skulle vera det, for så å snu to månadar seinare.
3. plass: Linnéa Myhre
Bio: Linnéa var ein av dei aller første som oppretta blogg i 2006, der det aller første innlegget var ei rangering av hennar favoritt-Fjordland-rettar. Bloggen «Alt du vet er feil» utvikla seg fort til å bli ein oppsummering over ting 17-åringen irriterte seg over i kvardagen – derav stempelet «sinnabloggar». Moldensaren skreiv også ærleg om depresjon og eteforstyrring.
Bloggkarrieren «peaka» i 2011 då ho vart kåra til årets bloggar av Costume og under Vixen (på prisutdelinga kalla ho seg sjølv og bloggkollegaene for taparar til VG). Det same året annonserte Myhre at ho kom til å slutte å bloggga, fordi det var «best å gi seg på topp». Ho byta ut bloggen med bøker og lagde P3-serien «La Linnéa leve» om mental helse.
Minneverdige augeblikk: Linnéa har ved fleire anledningar gått hardt ut mot innhald som ho meiner er skadeleg, slik som Caroline Berg Eriksen, aka Fotballfrue, sin kaloritelje-video i fjor. Men den kritikken som kanskje skapte mest furore, var då Linnéa i 2022 la ut ein Twitter-tråd om eit nylansert program:
«TVNorges «16 ukers helvete» er kanskje det jævligste jeg har sett siden Kari Jaquesson lagde slanke-tv med BARN i 2006. Hva er det dere DRIVER MED, TVNORGE?? ER DET INGEN VOKSNE PÅ JOBB?», var noko av det ho skreiv.
Deltakar Christer Falck svarte med eit innlegg på sin eigen Facebook-profil, der han blant anna skreiv:
«Noen fingre i halsen på 2000-tallet og VIPPS så er man også ekspert på ALLE ANDRES matvaner.»
Kvar er ho no: Brusblogg, bryllaup, Britney, programleiing, pusling, internettkultur og søvnlausheit er nokre ord som kan samanfatta kva Linnéa har halde på med dei siste åra. I tillegg har ho gjort det bra i ei rekke reality-seriar som «Kompani Lauritzen», «71 grader nord – team» og «Maskorama».
Ho er aktuell med NRK-podkasten «Lev vel», er forfattar, har laga eit samtale-spel med ektemannen og sine eigne Solo-brusar. Det kan også trygt seiast at karakteren Sinna-Linda i «Rekviem for Selina» har mange like trekk med unge Linnéa. Eller som 34-åringen sjølv sa: «Ganske spot on.»
2. plass: Emilie «Voe» Nereng
Bio: 95-aren frå Hønefoss var mest kjend under bloggnamnet Voe (oppkalla etter favorittbutikken Voice of Europe) då ho starta å blogga i starten av 2009, berre 13 år gammal. Etter eit halvt år hadde ho ifølge Side2 den mest lesne bloggen på blogglisten.no. Populariteten førte til modelloppdrag for jenteblad, musikkarriere, «Bloggerne»-deltaking og masse hatkommentarar.
I 2017 la ho ned bloggen for godt fordi ho trong å «å finne sæ sjæl». To år og ein ernæringsbachelor seinare kom ho tilbake i offentlegheita som matinfluensar. I 2021 vart Emilie årets matinfluensar under Vixen Awards, og i 2023 stakk ho av med juryens heiderspris.
Minneverdige augeblikk: Emilie starta 2025 med å løpa dritings, skrike, grine og «faceplante» på NRK. Etter å ha helt nedpå 23 glas vin i løpet av 42 kilometer, knekt to tenner, føkka opp kneet og trynet – i tillegg til å slå Nicolay Ramm – vart 29-åringen hylla som råsterk feminist.
– Eg er veldig søt og snill, men det bur også eit monster i meg. Det veit heile Noreg no, sa ho til A-magasinet i februar.
I fjor fekk Emilie mindre hyggeleg merksemd, då ho som storbonde i «Farmen Kjendis» valde paralympiaren Cato Zahl Pedersen som førstekjempe.
Kommentarar som «Simpelt og nedrig å velge Cato. Jeg er sjokkert over hvor kald og kynisk du har vist deg å være» gjorde at Nereng måtte ta seg ein pause frå sosiale medium. Ting roa seg etter litt grining og forklaring av situasjonen på «God morgen Norge» saman med Cato.
Kvar er ho no: Matinfluensaren er å sjå i forskjellige TV-produksjonar. Ho er gründer, forfattar og har podkast saman med forloveden (tidlegare barneskodespelar) Michael Hansson. Dei to skal gifta seg i Kroatia i sommar etter å ha vore ilag sidan 2022.
Også Emilie kunne sjå ein slags versjon av seg sjølv på TV-ruta denne våren. Sjølv om ho innrømmer å kjenna seg att i sprudlande Natalie i «Rekviem for Selina», er ikkje nach-scenen basert på verkelege hendingar:
– Det er utruleg triveleg dersom det var sånn at eg, Linnéa Myhre og Sophie Elise hadde hange på den tida, men det skjedde dessverre aldri, sa Nereng i NRK-podkasten «Seriesnakk».
1. plass: Sophie Elise
Bio: 94-aren frå Harstad skreiv det første blogginnlegget sitt i 2011 under namnet Sophie Elise, men heiter eigentleg berre Sofie Steen Isachsen. Var med i «Bloggarane» frå sesong 1 til 5, men har også hatt sine eigne seriar på TV 2.
Ho har sidan gitt ut bøker, delteke i reality-TV og no altså vunne kåringa vår over «Noregs mest uforgløymelege influensar»!
Minneverdig augeblink: Sjølv ikkje Lars Tjærnås treng å lata som om han ikkje veit kven Sophie Elise er. Ho har blogga ufiltrert i ei årrekkje og stått i fleire stormar. Då ho tatoverte hovudbotnen bak øyret for å skjula høgt hårfeste i 2019, small det verkeleg. Kristin Gjelsvik omtalte ho som «Noregs farlegaste førebilete», og det heile enda opp på «Debatten».
Eit år seinare var ho endå ein gong tema på «Debatten» etter å ha dokumentert ein rumpeoperasjon i TV-serien «Sophie Elises verden».
I september 2022 fekk ho og Fetisha Williams sin eigen podkast på NRK, men det vart med eit halvt år.
I februar 2023 publiserte ho nemleg eit bilete på Instagram av seg og ei venninne, der venninna heldt ein liten pose med noko kvitt i. Ifølge Sophie låg bildet berre ute i nokre få minutt før det vart sletta, men Mads Hansen (sjølvsagt) såg sitt snitt til å dela dette biletet vidare, som førte til ein massiv klagestorm mot NRK.
Kringkastingsrådet fekk over 3700 klager, noko som gjorde dette til ei av dei største klagesakene i rådets historie. NRK og Sophie Elise og Fetisha Williams vart med det samde om å avslutta samarbeidet.
Kvar er ho no: Etter bildeskandalen fekk ho seg kjærast, flytta til Trondheim og vart gravid. Sonen vart fødd for eitt år sidan og paret har flytta tilbake til Oslo. Nyleg vart det kjent Sophie Elise hadde blitt klaga inn til barnevernet, der det vart hevda at ho ikkje var ei god mor – basert på det ho hadde delt på sosiale medium. Barnevernet på Frogner har konkludert med at det ikkje er grunn til bekymring, og saka er avslutta.
Influensaren er også gründer og har bidrege som manuskonsulent på NRK-suksessen «Rekviem for Selina», der hovudkarakteren er basert på hennar liv.
LES MEIR FRÅ P3.NO:
