Dei utsmykkar kanskje Instagram-kontoen sin med spørsmålet «hvem faen er Ka2», men spørsmålet er vel i ferd med å bli nokså utdatert.
I dag er spørsmålet mest noko dei brukar til branding.
For dei siste åra har duoen både fått folk til å danse, danse, danse med ein tjommi, bli fakked på byn og blitt lagt grunnlaget for mang ein sommarflørt.
Går ein laus på Ka2 med mål om å finne ei djupare intellektuell meining er det eigentleg bortkasta arbeid.
Musikalsk flytande ein stad mellom psykedelisk diskopop og skamlaus tekno er det like greitt å gjere det enkelt: Alt som ikkje gjeld fest og smittande glede skal vike i jakta etter den reine, euforiske stemninga.
Flugesopp og romvesen
Tidlegare på dagen rakk ei hissig regnbye av det slaget berre ein austlandsk solskinsdag kan provosere fram å væte ut det meste av festivalgjengarar. Og like før konsertstart gjer ei ny mørk sky eit ærleg forsøk på å repetere seansen.
Ein skal vere rimeleg frisleppen for å assosiere styrtregn med fest, og det er derfor høgst spanande om bekymringane har overgått partyhumøret når konserten startar.
Overraskande nok er det heller bandet, med Didrik Thulin i spissen, som treng mest tid for å verkeleg kome i støyten i det «Den jeg vil ha» opnar showet.
Det verkar som at han er meir bekymra enn publikum for korleis konserten skal utarte seg.
Så lenge må ein ikkje vente, og innan «Gatelangs» rungar ut over konsertområdet, er superlaget publikum og Ka2 eit faktum.
Då er det ingen veg attende. Omgitt av flugesopp og tidvis av dansande romvesen, brukar ikkje Thulin tid på dei lange monologane.
Han snirklar seg heller lettkledd rundt på scena og dirigerer forsamlingen gjennom låtar som «Stjal du hjertet mitt» og «Tror du at han bryr seg» (Ka2 bryr seg, forsikrar han).
Mange tjommiar
Det går hakk i hakk, og ofte takast det ikkje eingong pause mellom låtane.
Medan «Fakked på byn» er i ferd med å avslutte, fortel Thulin om det erkebergenske uttrykket «tjommi». Ein god, varm ven, som berre vil deg vel.
På Slottsfjell er alle kvarandre sin tjommi, og låten går umiddelbart over i «Danser med tjommi», til massiv respons.
45 minutt er i knappaste laget, men Ka2 brukar tida effektivt og oppnår det dei kom til Tønsberg for å gjere.
Når allsongen rungar og hendene strekker seg mot himmelen til avslutningslåten «Blomsterdalen» har sola for lengst vunne slaget om festivalværet og den euforiske stemninga er sikra. Dette var det ein glede å vere vitne til, Ka2.
Sjå Ka2 spele live på Neon-festivalen tidlegare i sommar her!
LES FLEIRE ANMELDELSAR:
SISTE FRÅ P3.NO:
