18. oktober kl. 15.30 startar 100 timar med galskap for Redd Barna, men med ein litt annleis vri.

Dei siste åra har fire programleiarar gått igjennom storslegne forvandlingar, smerte og mentale prøvelsar i eit glasbur på Solsiden i Trondheim. Men slik blir det ikkje i år.

Det vil seia: Programleiarane skal få testa grensene sine i år også, men denne gongen blir det utan publikummet på Solsiden.

For denne gongen skal gjengen sperrast inne i 100 timar på NRK Tyholt. Dei skal leva utan mobil, utan kontakt med omverda og med eit kontor som soverom.

Og det er ikkje den einaste endringa i årets aksjon – men først: programleiarane!

«P3ligaen»-profilane Anna Nor Sørensen (27) og Henning Bang (22) leia aksjonen for første gong i fjor, og dei blir med også i år.

– Det kan bli gøy på både godt og vondt. I fjor la eg ned veto på omskjering, men det har eg ikkje gjort i år. Så om dei har lyst til å omskjere meg, skal dei få lov til det, melder Henning.

– Det er mykje nytt, og eg veit ikkje så mykje. Det gjer det jo veldig spanande, tilføyer Anna om det nye konseptet.

Egil Andreas Skurdal (27) frå «P3morgen» og Galvan Mehidi (34) kjent frå «Med all respekt» har vore innom aksjonen som gjestar før, men denne gongen skal dei vera med i alle 100 timane.

Galvan er nøgd med årets endringar – trur han.

– Eg har vore med som gjesteprogramleiar dei tidlegare åra, og då har eg tenkt: «Nei takk.» Det har vore gøy å komma innom og vera gjest, og så seia: «Okei, du får fortsetta å henga i dei krokane, så snakkast me.» Så eg er glad for at det blir litt annleis i år, sjølv om eg ikkje veit så mykje.

Hendinga han refererer til, er sjølvsagt aksjonen i 2020, då Martin Lepperød trædde kjøttkrokar gjennom huda og hang frå taket.

Ny oppgåve kvar time

Aksjonen har altså ikkje berre flytta på seg, men sjølve konseptet har også blitt fornya. Det blir framleis forvandlingar og utfordringar, men i år skal programleiarane ikkje berre få eit par utfordringar kvar.

I år blir det nemleg: «100 oppgåver på 100 timar»!

I det ein ny time startar, får ein eller fleire av programleiarane ei ny oppgåve dei må fullføra i løpet av timen. Slik vil det fortsetta også gjennom heile natta.

Oppgåvene skal anten løysast inne i studio eller ute i trondheimsområdet. For kvar oppgåve som blir løyst, vil programleiarane sanka poeng. Personen som sankar flest poeng, vil stikka av med tittelen «Årets P3aksjonist».

Og denne konkurransen har allereie begynt: Det er om å gjera å samla inn mest mogeleg pengar til sendestart. Du kan støtta programleiaren du vil skal vinna, ved å bidra på «spleis.no/programleiaren sitt fornamn»!

Årets sak og program

Innimellom tøys og vas skal programleiarane bevisstgjera publikum på årets sak, som er «100 timar for krigsramma barn».

Innsamlinga går til Redd Barna, som skal hjelpe barn ramma av krig og konflikt. Målet er at barna skal få leika, læra og leva i fred. Pengane blir fordelt mellom prosjekt i Ukraina, Syria, Bangladesh, Sør-Sudan, DR Kongo og Noreg.

I fjor blei det samla inn over 6,5 millionar kroner til Leger utan grenser og deira arbeid med å overvinna gløymde epidemiar i DR Kongo, Den sentralafrikanske republikken, Bangladesh og Sierra Leone.

Les også: På dette fotballaget har de fleste én ting til felles – de har vokst opp i krig

Tidlegare år har me blant anna sett Ingrid Simensen bli forvandla til sitt store idol frå bandet Tokyo hotel og Anna Nor Sørensen bli til den mest kjende gingeren gjennom tidene.

Markus Neby her ete ein ispinne laga av Vida Lill sitt tiss, og Martin Lepperød hang i kjøttkrokar.

Sjølv om konseptet blir nytt i år, blir det minst like mange ville ting å følga med på og mange gode grunnar til å bidra med pengar til ei god sak!

Lad opp til årets aksjon med høgdepunkta frå i fjor!

Desse skal løysa 100 oppgåver på 100 timar

Fleire kjende fjes dukkar opp

Anna, Galvan, Henning og Egil blir sjølvsagt ikkje dei einaste folka me skal glana på i 100 timar.

Dei får besøk av fleire gjesteprogramleiarar!

På torsdagen kjem «Vettskremt»-programleiar Annika Momrak, og på fredag kjem Steinar Klouman Hallert frå NRK-podkasten «Både Erlend og Steinar».

På laurdag får me besøk av «P3morgen»-profil Karsten Blomvik, som var programleiar for aksjonen i fjor.

Siste hjelpande hand på dagtid: Artisten Julie Bergan kjem innom på søndagen!

I løpet av nettene får programleiarane besøk av gjesteprogramleiarane Arianrhod «Arian» Engebø og Nate Kahungu frå «StudioP3», som begge har vore innom «P3aksjonen» på fleire måtar tidlegare!

Nate har vore med på nattesendingane før, og dei siste to åra har Arian vore programleiar for aksjonen. I fjor måtte ho blant anna levera ein burgar til Tore på sporet og ha seksualundervisning for 16-åringar.

Også komikarane Nora Svenningsen, Maria Stavang og Javad El Bakali kjem innom på natta.

Nattesendingane er vel verdt å få med seg dersom du har stamina til å halda deg vaken, for desse har ein tendens til å gå litt av skaftet.

Her har me sett alt frå Henning som blindsmakar på kjønnshår, til komikar Mohammed Basafer som får navlepiercing. Og lat oss ikkje gå inn på spyvaflene til Maria og Martin for to år sidan!

Gir deg opp til årets aksjon med høgdepunkta frå i fjor:

LES MEIR: